ریڈیو کی آواز شمارہ نمبر 03 ستمبر 2017

ریڈیو کی دنیا کے دوستو ۔
السلام علیکم
امید ہے کہ آپ  تمام دوست خیریت سے ہونگے اور اپنی اپنی پسندیدہ نشریات سے لطف اندوز ہورہے ہونگے ۔ ریڈیو کی دنیا کی کچھ سرگرمیاں لیئے آپ کی خدمت میں حاضر ہیں ۔نیچے دئیے گئے لنک کے ذریعے  ماہ ستمبر کا آن لائن میگزین ریڈیو کی آواز کا شمارہ نمبر 03 پڑھا 
جاسکتا ہے ۔

ریڈیو لسنرز کلب نشریات کی دنیا کے ماتھے کا جھومر آن لائن نمائش کا اختتام

اسلام علیکم  دوستو
جیسا کہ آپ تمام دوستو کو علم ہے  جس آن لائن نمائش " ریڈیو لسنرز کلب نشریات کی دنیا کے ماتھے کا جھومر" ہم نے 02 جولائی کو شروع کی تھی وہ آج بخیر خوبی اختتام کو پہنچ رہی ہے ،  اس پر اللہ تعالی کت سامنے سجدہ ریز ہیں کہ اس ذات نے بہت سی مشکلات  کے باوجود کامیابی سے ہمکنار کیا۔ ہمیں بہت خوشی ہے کہ اس میں شرکت کرنے والے کلبوں نے بہت بھرپور انداز میں شرکت کی یقین جانیں اس کا ہمیں خود بھی اندازہ نہیں تھا  بلکہ یہ کہنا غلط نہ ہوگا کہ اس نمائش میں ایسے ایسے نوادرات پوسٹ کیئے گئے جنہیں ہم دیکھ کر نہ صرف حیران ہوئے بلکہ ہمارا سر فخر سے بلند ہوگیا کہ ہمارے سامعین دوست  نشریاتی اداروں سے موصول ہونے والی چیزوں کو اتنی محبت سے سنبھال کر رکھے ہوئے ہیں ۔جہاں کلبوں نے بڑھ چڑھ کر حصہ لیا وہیں اس نمائش کو دیکھنے والوں نے بھی اسے بہت سراہا جس میں نشریاتی اداروں کی بھی بڑی تعداد شامل ہے جنہوں نے گاہے بہ گاہے اپنے پروگراموں میں اس حوالے سے تعریفی پیغامات نشر کیئے ۔ ہم ان تمام نشریاتی اداروں، سامعین اور ناظرین کے تہہ دل سے شکرگذار ہیں ۔ یہاں پر ہم انٹرنیشنل ریڈیو لسنرز آرگنائیزیشن کے ممبران کا بھی شکریہ ادا کرتے ہیں جنہوں نے اس تقریب کے لیئے بہت بہت محنت کی کئی کلبوں کی اس قدر زیادہ   پوسٹنگ ہوئیں کہ ہمیں راتوں کو جاگ کر انہیں اپروو کرنا پڑا یا پھر انہیں نمائش کے صفحہ پر ترتیب دے کر منتقل کرنا پڑا جو ایک محنت طلب کام تھا ۔جہاں ایک جانب کلبوں نے سامعین کے سامنے اپنی اشیاء پیش کیں ان سے نئے سامعین میں ریڈیو کی رغبت بڑھی وہیں ان کی تمام اشیاء بھی یکجا ہو کر انٹرنیٹ پر محفوظ ہوگئیں ۔
یہاں ریڈیو سامعین کی محفل واٹس ایپ گروپ کے تمام ممبران کا بھی شکریہ ادا کرنا لازم ہے کہ انہوں نے اس تمام عرصے میں تنظیم کے ساتھ بے انتہا تعاون کیا اور ساتھیوں کی نمائش میں پوسٹنگ کرنے کے بارے میں رہنمائی کرتے رہے۔
نمائش کے آغاز پر بنائی جانے والی جیوری میں شامل اراکین نے بھی نہایت باریک بینی سے نمائش کا جائزہ لیا اور شریک کلبوں کی نا صرف رہنمائی کی  بلکہ ان کی بہترین حوصلہ افزائ بھی کی ۔
دوستو ۔ آج رات اس تقریب کا اختتام ہوجائے گا پھر جیوری میں شامل معزز منصفین  فیصلہ کرینگے کہ اس کے نتیجے کا اعلان کب کیا جائے  ۔ جیوری نتیجہ کا اعلان براہ  راست کرے گی ۔ یہاں جیوری کو ایک بات واضح کرتا چلوں کہ مجھ سمیت تنظیم کے کسی بھی ممبر کو نہیں معلوم کہ کیا نتیجہ آئے گا  ، اگر تنظیم کی جانب سے مجھ سمیت کسی بھی ممبر نے نتائج  کے لیئے کسی بھی کلب کی سفارش کی یا ایسی کوئی بات کی جس سے یہ تاثر ملا کہ تنظیم کا رجحان کسی ایک کلب کی جانب ہے تو جیوری اراکین اس ممبر کا نام  فیس بک گروپ یا نمائش کے صفحہ پر پوسٹ کرسکتے ہیں جسے فوری طور پر تنظیم سے خارج کردیا جائے ۔
دوستو۔ نمائش کا اعلان اس کے شروع ہونے سے ایک ماہ پہلے سے کیا جاتا رہا لیکن نمائش شروع ہونے کے بعد بہت سے کلبوں نے تنظیم سے رابطہ کیا اور کچھ انفرادی سامعین نے بھی کہ ہم بھی نمائش میں حصہ لینا چاہتے ہیں لیکن ہمارے لیئے ایسا ممکن نہیں تھا اس لیئے تنظیم کی جانب سے یہ فیصلہ کیا گیا ہے کہ ایسے تمام کلب اور سامعین کو بھی موقع دیا جانا چاہیئے تاکہ ان کی حوصلہ افزائی ہو  گو کہ  وہ مقابلے میں شامل نہیں ہونگے، اسی خاطر کل مورخہ 10 اگست 2017 سے وہ تمام کلب اور سامعین اپنی پوسٹنگ تنظیم کے فیس بک گروپ کے صفحے پر کرسکتے ہیں ، نمائش کے صفحے پر پوسٹنگ کا طریقہ کار کچھ دوستو ں کو دشوار لگتا ہے اس لیئے فیس بک گروپ کے صفحے پر بھی پوسٹنگ کی سہولت دی گئی ہے ۔ہمیں خوشی ہے کہ کل ہمارے  بہت سینئیر سامع اور ڈی ایکسر محترم جناب عابد حسین ساجد صاحب اپنی پوسٹنگ کا آغاز کرینگے اسی طرح ایک دوسرے سینئیر سامع جناب سراج نظامانی صاحب بھی پوسٹنگ کا ارادہ رکھتے ہیں مزید کلب اور سامعین کو بھی مکمل آزادی ہے بلکہ اس تحریر کی توسط سے دل کی گہرائیوں سے انہیں شرکت کی  دعوت دی جاتی ہے ۔
دوستو۔ نمائش میں  کلبوں کی بھرپور شرکت اور دلچسپی کو دیکھتے ہوئے تنظیم نے یہ بھی فیصلہ کیا ہے کہ اس نمائش کا انعقاد ہر سال کیا جائے گا  کیوں کہ یہ پہلی آن لائن نمائش تھی اس لیئے کلبوں کو ان کے قیام سے لے کر اب تک کی کارکردگی پوسٹ کرنے کو کہا گیا تھا  لیکن مستقبل میں منعقد ہونے والی نمائش میں کلب ایک سال کی کارکردگی پیش کرینگے یعنی اگلے سال نمائش میں کلبوں کی اگست 2017 سے 2018 کے نمائش کے انعقاد والے ماہ تک کی کارکردگی پوسٹ کرنی ہوگی جس کے لیے دوستوں کو  ان اشیاء کی تصاویر محفوظ رکھنی ہونگی جو ظاہر کرینگی کہ یہ اگست 2017 سے 2018 کے درمیان موصول ہونے والی اشیاء ہیں۔ اس بات پر بھی غور کیا جارہا ہے کہ آئیندہ انفرادی سامعین کو بھی موقع دیا جائے کہ وہ بھی نمائش میں شرکت کریں (اس پر صلاح مشورے جاری ہیں ) ۔

دوستو ۔ یہ تمام کامیابیاں آپ تمام سامعین دوستوں کی مرہون منت ہے اگر سامعین کی کڑیاں یک جا نا ہوتیں تو کبھی یہ مضبوط زنجیر نا بنتی تمام موتی یکجا نا ہوتے تو خوبصورت مالا نا بنتی تمام پھول یکجا نا ہوتے تو یہ مہکتا گلدستہ کبھی نا بنتا ۔ آج میں برملا اس نمائش کی مقبولیت اور کامیابی کا سہرہ  تمام ریڈیو سامعین کے سر باندھتا ہوں کہ اگر آپ سب کا ساتھ نا ہوتا تو یہ کبھی بھی ممکن نا ہوتا ۔
آخر میں ان تمام کلبوں کے سربراہان کا شکریہ جنہوں نے اس نمائش میں شرکت کرکے اسے ایک ناقابل فراموش تقریب بنادیا  جن میں العوان لسنرز کلب فیصل آباد  پاکستان کے لیاقت علی اعوان صاحب ، دیش پریمی ریڈیو لسنرز کلب  بھارت کے عابد علی منصوری صاحب ، انٹرنیشنل ریڈیو  لسنرز فرینڈ شپ بھارت کے متل کانسل صاحب ،جئے ساگر بلوچ ریڈیو لسنرز کلب سانگھڑ پاکستان کے ساگر دین محمد بلوچ صاحب ، جناح ڈی ایکس کلب لیہ  پاکستان  کے محمد ادریس صاحب ،جسکانی ریڈیو لسنرز کلب خیرپور میرس  پاکستان کے شاہنواز جسکانی صاحب ،محبت لسنرز کلب پتوکی پاکستان  کے  ساجد ارشاد نمبردار صاحب، پاک لسنرز کلب جھنگ پاکستان کے  محمد عقیل بشیر صاحب ، ساقی انٹرنیشنل لسنرز کلب جھنگ پاکستان کے  تنویر ساقی صاحب ، ستوڑہ لسنرز کلب ٹیکسلا پاکستان کے سردار منیر اختر صاحب ، سیون اسٹار لسنرز کلب چینیوٹ پاکستان کے سلیم اختر چدھڑ صاحب ، ایشیاء انٹرنیشنل ریڈیو لسنرز کلب دادو پاکستان کے امین لغاری صاحب  اور یونیورسٹی ریڈیو لسنرز کلب فیصل آباد کی محترمہ  سمیرہ اکبر صاحبہ شامل ہیں ۔
ہم جیوری میں شامل عابد حسین ساجد صاحب ، دلدار  لغاری صاحب ،مہر عبدالستار سلفی صاحب ، اعظم سومرو صاحب اور عقیل مشرفی صاحب  کے بھی مشکور ہیں کہ انہوں نے شرکت کرنےوالے کلبوں کی حوصلہ افزائی کی  اور کلبوں کی رہنمائی کی اور جہاں کوئی غلط  پوسٹنگ دیکھی اس کی نشاندہی کی ۔دوستو  انسان خطاء کا پتلا ہے ہم سے کہیں نا کہیں  غلطی بھی ہوئی ہوگی کسی کی دل آزاری بھی ہوئی ہوگی اس کے لیئے ہم معافی کے طلب گار ہیں ۔
ہم ایک بار پھر آپ تمام دوستوں کا دل کی گہرائیوں سے شکریہ ادا کرتے ہیں  جنہوں نے ہمیں یہ احساس دلایا کہ اس نمائش کا انعقاد ہماری تنظیم نے نہیں بلکہ تمام ریڈیو سامعین نے کیا اورہماری قدم قدم پر رہنمائی کی  مدد کی مشورے دیئے ۔
اللہ ہم سب کا حامی و ناصر ہو
محمد ارشد قریشی 

ریڈیو انٹینا خود بنائیں اور صاف نشریات سے لطف اندوز ہوں

تجربات ، مشاہدات و تحریر سردار منیر اختر ، ٹیکسلا پاکستان
ریڈیو سامعین دوستو اسلام علیکم
میرا نام سردار منیر اختر ہے میں ٹیکسلا میں مقیم ہوں اور ستوڑہ لسنرز کلب کا صدر اور انٹرنیشنل ریڈیو لسنرز آرگنائیزیشن پاکستان کا فعال ممبر ہوں ، آپ جانتے ہیں کہ زیادہ تر ریڈیو نشریات اب انٹرنیٹ پر بھی دستیاب ہیں اس کے باوجود دنیا بھر میں سامعین کی ایک بہت بڑی تعداد اب بھی فریکونسی پر نشریات سننے کو ترجیح دیتی ہے لیکن دنیا میں کئی جدید ٹیکنالوجی کے وارد ہونے کے بعد اور عالمی سطح پر ماحولیاتی تبدیلی کی وجہ سے فریکونسی نشریات میں ماضی کی بانسبت کافی شور اور خلل واقع ہوتا ہے ، میں سامعین دوستوں سے نشریات کو بہتر کرنے کے حوالے سے چند اپنے تجربات شئیر کرنا چاہتا ہوں جس سے آپ ریڈیو نشریات بہتر انداز میں سن سکتے ہیں ۔

اگر آپ ایکسڑنل انٹینا استعمال کرنا چاہتے ہیں اور اس کا   سائز چھوٹا ہے پھر تو آپ اس کی تار کو ڈائریکٹ ریڈیو انٹینا سے منسلک کردیں لیکن اگر آپ کے بنائے ہوئے 
 انٹینا کا سائز بڑا ہے  تو پھر انٹینا کی تار ننگی کر کے اسے ریڈیو کے انٹینا کے ساتھ بلکل نہ لگائیں  بلکہ اس تار کو ذرا سا ننگا کر کے ریڈیو جہاں پہ رکھا ہے وہاں  رکھ دیں یا ریڈیو کی پشت کے ساتھ سلوشن ٹیپ سے چپکا دیں کیونکہ ڈائریکٹ تار لگانے سے اتنی اور لوڈینگ یعنی مداخلت  ہوگی کہ آپ ملی جلی آوازوں میں سے اپنی من پسند نشریاتی نہیں سن سکیں گے کیونکہ اس طرح دیگر نشریات کی مداخلت مزید تیز ہوجائے  گی۔انٹینا کے لیے تانبے (کاپر)کی تار  جو کے ٹیلی فون کی مین لائین  میں جسے ڈراپ وائر  بھی کہتے ہیں استعمال ہوتی ہے  اس تار کا ایک فٹ کا ٹکڑا بھی بہتر نشریات سننے کے لیے آپکا بہت بڑا معاون ثابت ہوسکتا ہے  اس ایک فٹ کے ٹکرے کے ساتھ تار لگا کر تار کا دوسرا سرا ریڈیو کے انٹینا سے لگا دیں اور کاپر وائر یعنی تانبے کی تار کو آپ تھوڑا اونچا رکھیں  لیکن اس بات کا خیال رکھیں کہ اسے بجلی کی تاروں سے دور رکھیں ورنہ یہ بجلی کی مداخلت کی وجہ سے نشریات واضح کرنے کے بجاے شور کا سبب بن سکتا ہے ۔


اس کے علاو ٹیلیویژن کی نشریات دیکھنے کے لیئے استمال ہونے والی   ڈش کی چھتری کے ساتھ لگی تار جو ایل این بی سے  ڈش کے  ریسیور کی طرف آتی ہےاسے بھی ریڈیو کے ساتھ لگا کرآپ نشریات بہت واضح سن سکتے ہیں۔خیال رہے کہ ڈش انٹینا  کی چھتری سے آنے والی تار جو ڈش ریسور کے ساتھ منسلک ہوتی ہے  اسے ڈش ریسور سے نکال کے ریڈیو انٹینا سے لگانا ہوگا ۔ٹیلیویژن کے جدید کیبل سسٹم آنے کے بعد دیکھنے میں آیا ہے کہ کئی گھروں کی چھتوں پر ڈش انٹینا لگا تو ہے لیکن اب استمال میں نہیں تو اسے ریڈیو ایکسٹرنل انٹینا کے طور پر استمال کیا جاسکتا ہے بس آپ نے کرنا صرف یہ ہے کہ اسے ڈش انٹینا کے ریسیور سے نکال کر ریڈیو کے انٹرنل انٹینا نے ساتھ  یا ریڈیو میں دئیے گئے ایکسٹرنل انٹینا کے پوائینٹ میں لگانا ہے ۔

اس کے علاو ٹی وی کے ابتدائی ادوار میں  ٹی وی کے ساتھ ایک انٹینا آیا کرتا تھا جو سلور دھات سے بنا ہوتا تھا  بلکل ریڈیو انٹینا کی طرح لیکن ریڈیو انٹینا کی ایک شاخ ہوا کرتی تھی لیکن ٹی وی کے اس انٹینا کی دو شاخیں ہوتی ہیں یہ انٹینا بھی  ریڈیوکی نشریات کو صاف کرنے کے لیے بہت شاندار چیزہے۔

شارٹ ویو نشریات میں کاپروائر خاص کر کے 31میٹر بینڈ پر بہت اعلی طریقے سے کام  کرتی ہے  اس سے کوئی بھی اورلوڈینگ  یعنی کے مختلف ریڈیو سٹیشن کی ملی جلی مداخلتی  آوازیں نہیں آتی ہیں میں نے اپنے گاؤں میں تقریبا پانچ فٹ کی کاپر وائر کو تار کے ساتھ منسلک کر کے ریڈیو سے لگا رکھا تھا جس سے نشریات بہت واضح تھیں۔اردو نشریات کے لیے تار لگانے کی ضرورت نہیں تھی لیکن کچھ انگریزی نشریات جیسے ریڈیو نیدر لینڈ وغیرہ۔

 ایک اور تجربہ سلور کی وہ پرات ہے جسے تھالی  بھی کہا جاتا ہے  جسےعمعوما ہماری خواتین آٹا گوندھنے کے لیے استعمال کرتی ہیں اور ماضی میں جب ڈش انٹینا یا ٹی وی کیبل نہیں تھا تو لوگ سلور کی اسی پرات کو عمان اور دور درشن ٹی وی کی نشریات حاصل کرنےکے لیئے  ٹی وی انٹینا کے ساتھ منسلک کردیا کرتے تھے  ، اس پرات  میں بھی تار لگا کرریڈیو کے ساتھ لگانے سے تمام میٹر بینڈ پر نشریات میں بہت بڑا فرق سنائی دیتا ہے اور مداخلت اور شورو غل کی آواز بھی نہیں آتی۔

انٹرنیشنل ریڈیو لسنرز آرگنائیزیشن پاکستان کے زیر اہتمام آن لائن نمائش کا انعقاد


ہمیں یہ اطلاع دیتے ہوئے نہایت مسرت ہورہی ہے کہ  سال رواں کے ابتداء میں ہمارے کلب انٹرنیشنل ریڈیو لسنرز کلب پاکستان نے اس جدید دور میں ریڈیو کی کم ہوتی افادیت اور اہمیت کو مدنظر رکھتے ہوئے ریڈیو کی بقاء اور ترقی کی خاطر مشترکہ جدوجہد کی غرض سے دنیا بھر کے ریڈیو سامعین کو ایک پلیٹ فارم  پر یکجا کرنے کا جو خواب دیکھا تھا الحمداللہ رب ذولجلال کی مدد  و رضا  ،  وطن عزیز پاکستان سمیت دنیا بھر سے ریڈیو سامعین  اور نشریاتی اداروں کے بے پناہ تعاون سے آج شرمندہ تعبیر  ہو رہا ہے، اس کامیابی پر ہم  بارگاہ  رب کریم میں سجدہ ریز ہیں ۔
جیسا کہ آپ کے علم میں ہے کہ پہلے ہم کلب کے ساتھیوں کے ساتھ اس کارواں کو لے کر آگے بڑھے اور اب دنیا بھر کے ریڈیو سامعین اور سامعین کلب  ہمارے کارواں میں شریک ہوچکے ہیں اس وجہ سے کلب کے ممبران اور کلب میں شمولیت اختیار کرنے والے دنیا بھر کے سامعین کلبوں کے مشورے  سے ریڈیو سامعین کے مشترکہ اس پلیٹ فارم  کے نام میں کلب کی جگہہ آرگنائیزیشن کی تبدیلی کو فیصلہ کیا گیا  آج سے  35 سال  پہلے ہم نے جس کلب کی بنیاد رکھی تھی  الحمداللہ   وہ آج آرگنائیزیشن کی شکل اختیار کرگیا ۔یہاں یہ بات بھی قابل ذکر ہے  کہ سال رواں کے آغاز میں ہم نے ریڈیو سامعین کی جانب سے ایک مشترکہ سلوگن دیا  تھا  کہ " ریڈیو ماضی نہیں  مستقبل ہے " جو اب ریڈیو کی دنیا کا  مقبول سلوگن بن چکا ہے جس کے لیے ہم تمام ریڈیو سامعین کے ساتھ ساتھ نشریاتی اداروں کے بھی شکرگذار ہیں جنہوں نے اسے متعارف کرانے میں اہم کردار ادا کیا اور ہماری کاوشوں کو سراہا۔
اسی سلوگن کو عملی جامہ پہنانے کے لیئے  ہماری تنظیم نے دنیا بھر کے ریڈیو سامعین کی ایک آن لائن نمائش  بعنوان " ریڈیو لسنرز کلب نشریات کی دنیا کے ماتھے کا جھومر" کرانے کا فیصلہ کیا جس کا آغاز یکم جولائی سے کردیا گیا اس نمائش میں دنیا بھر سے ریڈیو سامعین ، نشریاتی ادارے اور ریڈیو کے ہر شعبہ سے وابسطہ افراد شرکت کریں گے  یہ نمائش ماہ اگست کے درمیان تک جاری رہے گی جس میں شرکت کرنے والے ریڈیو سامعین کلب   کے لیئے تین دن مختص کیئے گئے ہیں جس میں ہر کلب پہلے دن اپنے کلب کا تعارف پیش کرے گا کہ اس کی بنیاد کب رکھی گئی، کس علاقے میں کلب قائم ے وغیرہ وغیرہ ،  یہ ہر کلب پر منحصر ہے کہ وہ  جتنا تفصیلی یا محدود تعارف پیش کریں ،  دوسرے دن  کلب اپنے کلب  کو ملنی والی نشریاتی اداروں یا ریڈیو کے حوالے سے کسی بھی  جانب سے اشیاء، اعزازات کی تصاویر، کلب کے زیر اہتمام ہونے والی سرگرمیوں کی تصاویر وغیرہ وغیرہ  نمائش کے پیج پر اپ لوڈ کرے گا،  تیسرے دن کلب کا نمائیندہ نئے آنے والے سامعین کی جانب سے پوچھے گئے سوالات کے جواب اور ان کی رہنمائی کے لیئے مشورے دے سکتا ہے اور کمنٹس میں کئے گئے سوالات کے جوابات  (اگر ضروری ہوں تو) دے سکتا ہے ۔
اس طرح ایک کلب کو تین دن مکمل کرنے ہیں ،ہر کلب کو دئیے گئے تین دن کے دوران پانج ججوں پر مشتمل جیوری ان تمام چیزوں کا بغور مطالعہ کرتی رہے گی اور تمام کلب کے ایام مکمل ہونے  اور نمائش کے عمل مکمل ہونے پر جیوری  کی جانب سے اعلان کیا جائے گا کہ کون سا کلب سب سے بہتر  کاکردگی کا مظاہرہ کرسکا    اعلان کے بعد اس کلب کو بیسٹ کلب کا ایواڈ سرٹیفکیٹ  دیا جائے گا ۔
ہم تمام نشریاتی اداروں، اخبار و جرائد  کے مدیران ، آن لائن نیوز ویب سائیٹ مدیران اور دنیا بھر کے سامعین اور ریڈیو سے وابسطہ شخصیات سے گذارش کرتے ہیں کہ وہ   ریڈیو سامعین کی پہلی آن لائن نمائش میں ضرور شرکت کریں اور اپنے تاثرات رقم کریں  ، آن  لائن نمائش کا لنک یہ ہے 

ضروری اطلاع

تما م سامعین دوست جو آن لائن میگزین "ریڈیو کی آواز"
 میں اپنا، اپنے کلب کا تعارف، کلب کے تحت ہونے والی
 سرگرمیوں کی رپورٹ، ریڈیو لسننگ سے متعلق کوئی بھی
 تحریر کسی بھی نشریاتی ادارے سے متعلق اپنے تبصرے
  روانہ کرنے کے خواہشمند ہیں وہ اپنی تحریریں
 ( ایم ایس ورڈ   اردو   یا ان پیج فارمیٹ ) پر بمعہ ایک
 تصویر نیچے دیئے گئے  ای میل   پر روانہ کردیں

ریڈیو سامعین کی محفل

ریڈیو سامعین کی محفل  
دنیا بھر سے ریڈیو سامعین پر مشتمل گروپ" ریڈیو سامعین کی محفل"  اب میسنجر کے بعد واٹس ایپ پر بھی تشکیل دے دیا گیا ہے،گروپ میں شمولیت کے لیئے سامعین اپنا واٹس ایپ نمبر  "ریڈیو سامعین کی محفل" لکھ کرای میل کرسکتے ہیں۔
irlclub@hotmail.com  

انٹرنیشنل ریڈیو لسنرز کلب کا ملک بھر میں ممبر شپ کا آغاز


انٹرنیشنل ریڈیو لسنرز کلب نے ملک بھر سے ریڈیو سامعین کی ممبرشپ کا آغاز کیا ہے ، ریڈیو سننے والے تمام سامعین کو کلب کی ممبر شپ  پیش کی جارہی ہے جس کے اغراض و مقاصد مندرجہ ذیل ہیں ۔
اغراض و مقاصد
1.تمام ریڈیو سامعین اور ریڈیو سے وابسطہ شخصیات کو ایک صفحہ پر لانا۔
2.پاکستان میں تمام ریڈیو سننے والے سامعین کو ایک دوسرے سے رابطہ میں رکھنا۔
3.پاکستان میں قائم تمام چھوٹے بڑے ریڈیو سامعین کلبوں کو ایک انٹرنیشنل پلیٹ فام  مہیا کرنا۔
4.ریڈیو کے حوالے سے اہم دنوں پر تمام سامعین اور سامعین کلبوں کے ساتھ مل کر پروگرام تریب دینا۔
5.عوام کو ریڈیو کی اہمیت اور افادیت سے آگاہ کرنا ، ورکشاپ، سیمینار اور نمائشوں کا اہتمام کرنا۔
6.پاکستان میں بننے والے نئے سامعین کلبوں کے ساتھ بھرپور تعاون کرنا اورمزید  کلبوں کے قیام کی ترغیب دینا۔
7.جو سامعین میں مقبول ترین نشریاتی ادارے تھے  جنہوں نے اردو نشریات ختم کردیں ان ممالک کی حکومتوں سے انہیں دوبارہ بحال کرنے کے لیئے بین القوامی سطح پر رابطہ کرنا۔
8. سامعین میں مقبول ترین نشریاتی اداروں کی حوصلہ افزائی کرنا اور انہیں زیادہ سے زیادہ تعداد میں  تبصرے روانہ کرنا ۔
9. پاکستان بھر سے نشریاتی اداروں کی نشریات کی ریسیپشن رپورٹ  مرتب کرنا   ااور روانہ  کرنا۔
10. دنیا بھر کے نشریاتی اداروں کے ذریعے پاکستان کے تشخص کو اجاگر کرنا ،پاکستانی ثقافت کو متعارف کرانا ، عالمی سطح پر پاکستان کے بارے میں پائے جانے والی منفی سوچ کو زائل کرانا۔
11.پاکستان بھر کے ریڈیو سامعین ، سامعین کلب اور ریڈیو سے وابسطہ شخصیات سے رابطہ کے لیئے  ڈائیریکڑی مرتب کرنا۔
12.ریڈیو سے وابسطہ افراد کی خدمات کے اعتراف میں تعریفی سرٹیفکیٹ کا اجراء کرنا۔
13.سال بھر میں   ریڈیو کے حوالے سے سرگرم رہنے والے سامعین کو تعریفی سرٹیفکیٹ کا اجراء
14.ماہانہ بنیاد پر تمام پاکستانی سامعین سے آن لائن نشست کا انعقادکرنا۔
15.مندرجہ بالا  تمام نقاط پر رضاکارانہ طور پر عمل کرتے ہوئے ریڈیو سامعین کو ایک بہترین اور مضبوط پلیٹ فام مہیا کرنا۔
انٹرنیشنل ریڈیو لسنرز کلب کراچی پاکستان
irlclub@hotmail.com